Beasaindarrek irailaren 1etik 30era bitartean eskatu ahal izango dituzte 2025eko uraren, zaborraren eta kiroldegiko udako zerbitzuen gastuei aurre egiteko dirulaguntzak
Beasaingo Udalak 2025. urteari dagozkion udal tasak (ura eta zaborra) eta Antzizar kiroldegiko zerbitzuak erabiltzeagatiko tarifak ordaintzeko laguntzak eskatzeko epea iragarri du. Beasainen erroldatutako herritarrek irailaren 1etik 30era bitartean aurkeztu ahal izango dituzte eskaerak, iGunean bertan, telematikoki edo posta arruntez.
Udal laguntzak gastuaren % 100eraino
Udalak herritarren bizi-kalitatea bermatu nahi du, eta, horretarako, 2025eko uraren eta zaborraren tasen gastua arintzeko dirulaguntzak emango ditu. Laguntza hauen zenbatekoa elkarbizitza-unitatearen diru-sarrera garbien eta ondarearen arabera kalkulatuko da, betiere Gizarte Larrialdietarako Laguntzen (GLL) baremoak oinarri hartuta. Etxebizitza bakoitzeko eskaera bakarra egin ahal izango da.
Ezarritako muga ekonomikoen barruan dauden herritarrek gastatutakoaren % 50, % 75 edo % 100 jaso ahal izango dute, egoeraren arabera, gehienezko laguntza 600 eurokoa delarik. Alabaina, jabetzan bigarren etxebizitzaren bat edo lokalak % 100ean izanez gero, ezingo da deialdi honetan parte hartu.
Kiroldegiko udako tarifak ere diruz lagunduko dira
Udal kiroldegiko zerbitzuen erabilerari dagokionez, ekainetik irailera bitarteko tarifak baino ez dira diruz lagunduko. Kasu honetan ere, diru-sarreren baremoaren arabera banatuko dira laguntzak: muga zorrotzenak betetzen dituzten elkarbizitza-unitateek gastuaren % 80 jasoko dute, eta GLLen baremoaren muga zertxobait gainditzen dutenek (1 eta 1,5 artean), berriz, % 50eko laguntza eskuratu ahal izango dute.
Eskatzaile guztiek Beasainen erroldatuta egon behar dute dirulaguntza eskatzen den zerbitzua erabiltzen hasitako egunean.
Eskaerak aurkezteko hiru bide
Udalak izapideak erraztu nahi dizkie herritarrei, eta hiru bide egokitu ditu eskaerak aurkezteko:
- Presentzialki: Beasaingo Udaleko iGune bulegoan.
- Irailaren 1etik 11ra: 08:30etik 14:00etara.
- Irailaren 14tik 30era: 07:30etik 15:00etara.
- Telematikoki: Udalaren webgunearen bidez (www.beasain.eus).
- Posta arruntez: Eskaera postaz bidalita.
Deialdiaren datu eta muga nagusiak
- Eskaera epea: 2026ko irailaren 1etik 30era.
- Tasen laguntzak (ura eta zaborra):
- % 100eko laguntza (gehienez 600 €) baremoaren barruan daudenentzat.
- % 75eko laguntza (gehienez 500 €) muga 1 eta 1,5 bitartean dutenentzat.
- % 50eko laguntza (gehienez 400 €) muga 1,5 eta 2 bitartean dutenentzat.
- Kiroldegiko laguntzak (ekainetik irailera):
- % 80ko laguntza GLL muga gainditzen ez dutenentzat.
- % 50eko laguntza GLL muga 1 eta 1,5 artean dutenentzat.
- GLLen urteko diru-sarreren gehieneko muga:
- Pertsona 1: 15.358,95 €
- 2 pertsona: 20.478,60 €
- 3 pertsona edo gehiago: 23.550,39 €
- GLLen urteko ondarearen gehieneko muga:
- Pertsona 1: 20.000 €
- 2 pertsona: 25.000 €
- 3 pertsona edo gehiago: 30.000 €